सायबर गुन्हेगारीला बळी पडलेल्या एका ज्येष्ठ नागरिकाला पोलिसांनी कारवाई करत फसवणुकीतील ३४ लाख रुपये परत मिळवून दिले आहेत. मनी लाँड्रिंगच्या प्रकरणात नाव आल्याचे सांगून सायबर गुन्हेगारांनी या निवृत्त अधिकाऱ्याची ७८ लाखांहून अधिक रकमेची फसवणूक केली होती. या प्रकरणी सायबर पोलिसांनी गुन्हा दाखल करून राजस्थानमधून एका आरोपीला अटक केली आहे. भारतीय विमानतळ प्राधिकरणातून निवृत्त झालेल्या या अधिकाऱ्याला ११ नोव्हेंबर रोजी तथाकथित पोलीस उपनिरीक्षक विजय खन्ना नावाच्या व्यक्तीचा फोन आला. जेट एअरवेजचे अध्यक्ष नरेश गोयल यांनी केलेल्या ५३८ कोटींच्या फसवणुकीत अधिकाऱ्याच्या खात्यातून २ कोटी रुपये हस्तांतरित झाल्याचा दावा आरोपीने केला. कठोर कारवाई करण्याची धमकी देत आरोपींनी अधिकाऱ्याला व्हिडिओ कॉलवर राहण्यास सांगितले. त्यानंतर कारवाईची भीती दाखवून निवृत्त अधिकाऱ्याकडून एकूण ७८ लाख ५० हजार रुपये उकळले. आपली फसवणूक झाल्याचे लक्षात आल्यानंतर अधिकाऱ्याने सायबर पोलिसांकडे तक्रार दाखल केली. पोलिसांनी मनी ट्रेलच्या माध्यमातून तपास सुरू केला. तांत्रिक तपासाच्या आधारावर पोलिसांचे पथक राजस्थानमधील जयपूर येथे पोहोचले. तेथे ओमप्रकाश भवरलाल जाखड (वय ४९, रा. जयपूर) याला अटक करण्यात आली. ट्रान्सिट रिमांडवर त्याला नागपुरात आणण्यात आले आहे. गुन्हेगाराने वापरलेली विविध बँक खाती गोठवून पोलिसांनी निवृत्त अधिकाऱ्याला ३४ लाख रुपये परत मिळवून दिले. वरिष्ठ पोलीस निरीक्षक बळीराम सुतार, कविकांत चौधरी, शैलेश निघुट, अजय पवार आणि रोहित मटाले यांच्या पथकाने ही कारवाई केली.
सायबर फसवणुकीतील पीडिताला ३४ लाख परत मिळाले:मनी लाँड्रिंग प्रकरणात नाव आल्याचे सांगून केली होती फसवणूक
