मीरा भाईंदरमध्ये बिबट्याच्या हल्ल्यात सात जखमी; सात तास रेस्क्यू ऑपरेशन
पुणे, नाशिक, अहिल्यानगर नागपूर येथे बिबट्याने धुमाकूळ घातला. आता मुंबईनजीकच्या मीरा भाईंदरमधील एका इमारतीत शिरलेल्या बिबट्याने एकाच कुटुंबातील तीन जणांसह एकूण सात जणांना गंभीर जखमी केले. जखमींमध्ये २१ वर्षीय तरुणीचा समावेश असून तिच्या चेहऱ्यावर खोलवर
.
मीरा-भाईंदरमधील तलाव रोड परिसरातील पारिजात इमारतीत शुक्रवारी सकाळी आठच्या सुमारास भारती टाक यांच्या घरात बिबट्या शिरला. त्याने तिघांना जखमी केले. टाक कुटुंबियांच्या मदतीला धावलेल्या चौघांवरही त्याने हल्ला केला. आणि तो एका रिकाम्या खोलीत शिरला. तेव्हा नागरिकांनी प्रसंगावधान राखून त्याला कोंडले.
दरम्यान, खिडकीची ग्रील कापून जखमींना अग्निशमन दलाच्या जवानांनी बाहेर काढले. वन अधिकाऱ्यांनी बिबट्याला इंजेक्शन देत सात तासानंतर जेरबंद केले. तो तीन ते चार वर्षांचा नर असून त्याला संजय गांधी राष्ट्रीय उद्यानातील बचाव केंद्रात वैद्यकीय तपासणी व निरीक्षणासाठी ठेवण्यात आले आहे, असे संजय गांधी राष्ट्रीय उद्यानाचे उपसंचालक किरण पाटील यांनी सांगितले. तर ग्रामीण भागातून बिबटे थेट मुंबईपर्यंत पोहोचणे ही भितीदायक बाब असल्याचे परिवहन मंत्री प्रताप सरनाईक म्हणाले. जखमींची नावे, वय दिपू भौमिक (५२), भारती टाक (५५), खुशी मुकेश टाक (१९), अंजली मुकेश टाक (२१), राकेश यादव (५०), छगनलाल बगरेजा (४८), श्याम प्रताप सहानी १९).
संभाजीनगरच्या तिसगाव परिसरात बिबट्याचा वावर
तिसगाव परिसरात रो-हाऊस बांधकामाजवळ शुक्रवारी सकाळी साडेआठला डॉ. भरतसिंग सलामपुरे यांना बिबट्या दिसला. त्यांनी आरडाओरडा करून शेतकऱ्यांना सतर्क केले. हिरालाल सूर्यवंशी, देवीलाल सूर्यवंशी, सूरज सूर्यवंशी, मोहनसिंग सलामपुरे हे शेतात काम करत होते. तथापि, बिबट्याच्या पावलाच्या खुणा आढळल्या नाही, वनसेवक प्रभू हजारे यांनी सांगितले.
