फ्लॅट खरेदीसाठी माहेरावरून 25 लाख रुपये घेऊन येण्याच्या कारणावरून विवाहितेचा छळ करणाऱ्या कोथरुड (पुणे) येथील सासरच्या आठ जणांवर वसमत शहर पोलिस ठाण्यात शुक्रवारी ता. 12 रात्री गुन्हा दाखल झाला आहे.
.
पोलिसांनी दिलेल्या माहितीनुसार, वसमत येथील रिंकू यांचा विवाह सन 2018 मध्ये कोथरुड (पुणे) येथील श्रीनिवास क्षिरसागर याच्यासोबत झाला होता. विवाहानंतर एक वर्षापर्यंत सासरच्या लोकांनी चांगली वागणुक दिली. मात्र त्यानंतर किरकोळ कारणावरून वाद उकरून काढून मानसिक त्रास दिला जाऊ लागला होता. तुला जेवण बनविता येत नाही यासह इतर कारणांवरून त्यांचा छळ केला जात होता. तसेच फ्लॅट घेण्यासाठी माहेरावरून 25 लाख रुपये घेऊन येण्याची मागणी केली जात होती.
दरम्यान, माहेरची आर्थिक परिस्थिती बेताची असल्यामुळे त्या सासरच्या मंडळींची मागणी पूर्ण करू शकत नव्हत्या. त्यामुळे त्यांना शिवीगाळ करून मारहाण केली जाऊ लागली होती. सासरच्या मंडळींकडून तब्बल सात वर्ष होणारा त्रास त्यांनी सहन केला. मात्र त्यानंतर सासरचा छळ असह्य झाल्याने रिंकू ह्या माहेरी वसमत येथे राहण्यासाठी आल्या. त्यानंतर शुक्रवारी ता. 12 त्यांनी वसमत शहर पोलिस ठाणे गाठून सासरच्या मंडळी विरुध्द तक्रार दाखल केली.
यावरून पोलिसांनी श्रीनिवास क्षिरसागर, दशरथ क्षिरसागर, रोहित जगताप, संतोष गायकवाड, प्रतिक बारवे व अन्य तीन जण (रा. कोथरुड पुणे) अशा एकूण आठ जणांविरुध्द गुन्हा दाखल केला आहे. पोलिस निरीक्षक सुधीर वाघ, जमादार शेख नय्यर पुढील तपास करीत आहेत.
